लैंगिक हिंसाविरुद्धको अभियान चलाउन गाउँपालिका अध्यक्षले गरे नगद सहयोग
By Anusha sijapati
३ वर्ष अगाडि
Comments: 0
काठमाडौं, १४ मंसिर
दाङको राप्ती गाउँपालिका अध्यक्ष प्रकाश विष्टले लैंगिक हिंसाविरुद्धको १६ दिने अभियानमा सचेतना जगाउन भन्दै दुई सहकारी संस्थाहरुलाई व्यक्तिगत रुपमा १५–१५ हजार रुपैयाँ सहयोग गरेका छन् ।
आफूले पाउने मंसिर महिनाको सेवा सुविधाबाट राप्ती–३, मसुरियास्थित भृकुटी महिला विकास सहकारी संस्था र राप्ती–८ पिपरीस्थित लक्ष्मी महिला विकास सहकारी संस्थालाई अध्यक्ष विष्टले १५–१५ हजारको दरले ३० हजार रुपैयाँ सहयोग गरेका हुन् ।
‘सभ्य समाजको पहिचान : लैंगिक हिंसा विरुद्धको अभियान’ भन्ने मूल नाराका साथ राप्ती गाउँपालिकाको सभाहलमा आयोजित लैंगिक हिंसा विरुद्धको १६ दिने अभियानको कार्यक्रममा अध्यक्ष विष्टले उक्त रकम बराबरको चेक हस्तान्तरण गरे ।
कार्यक्रममा बोल्दै गाउँपालिका अध्यक्ष विष्टले लैंगिक हिंसा अन्त्यका लागि परिवार तथा समाजमा सचेतना फैलाउन जरुरी रहेको भन्दै त्यसका लागि महिला संघ संस्थाको अहम् भूमिका रहनु पर्ने बताए । पारिवारिक कलह एवं घरेलु हिंसाको मुख्य कारक मदिरा सेवन पनि रहेकाले यसको नियन्त्रणका लागि स्वयं महिलाहरु एकजुट र सचेत रहनुपर्नेमा उनले जोड दिए ।
कार्यक्रममा गाउँपालिका उपाध्यक्ष कमलापती चौधरीले समाजमा सचेतना फैलाउन आग्रह गर्दै शिक्षाको माध्यम र सचेतनाबाट यसलाई नियन्त्रण गर्न सकिने बताइन् ।
कार्यक्रममा राप्ती गाउँपालिकाका शिक्षा शाखा प्रमुख विश्वास विक, मोटिभेसनल स्पिकर राजन अधिकारी, भृकुटी महिला विकास सहकारी संस्थाका अध्यक्ष हिमाली न्यौपाने, प्रमेश्वरी ज्ञवाली लगायतको सहभागिता थियो ।
जिवनशैली, ताजा समाचार, देश, बागमती प्रदेश, लोकप्रिय
निश्ची अचार: सानो प्रयासबाट राष्ट्रिय पहिचान १ वर्ष अगाडि
