काठमाडौँ। सक्रिय राजनीतिमा प्रवेश गरेसँगै ऊर्जा, जलस्रोत तथा सिँचाइ मन्त्री एवम् उज्यालो नेपाल पार्टीका संरक्षक कुलमान घिसिङले काठमाडौँ महानगरपालिकाका मेयर बालेन शाहसँग भेटवार्ता गरेका छन्। यो भेटलाई देशको समसामयिक राजनीतिको सन्दर्भमा अर्थपूर्ण रूपमा हेरिएको छ।
आइतबार घिसिङले सामाजिक सञ्जाल फेसबुकमार्फत भेटको तस्बिर सार्वजनिक गर्दै देश विकासका मुद्दामा सहकार्य गर्ने प्रतिबद्धता व्यक्त गरेका छन्। उनले तस्बिरसँगै लेखेका छन्, “देश बनाउने अभियानमा हामी सँगै छौं।”
मेयर बालेन शाहको सचिवालय स्रोतका अनुसार यी दुई नेताबीचको भेट शनिबार बालेनको निजी निवासमा भएको थियो। भेटका क्रममा देशको समसामयिक राजनीतिक अवस्था र विकासका एजेन्डामा केन्द्रित रहेर छलफल भएको बुझिएको छ।
हालै मात्र ‘उज्यालो नेपाल पार्टी’ घोषणा गरेका घिसिङ र स्वतन्त्र रूपमा निर्वाचित भई जनचाहनाका कारण चर्चामा रहेका बालेन शाहबीचको यो भेटलाई धेरै राजनीतिक विश्लेषक तथा आम नागरिकले आगामी दिनमा सम्भावित सहकार्यको सङ्केतका रूपमा हेरेका छन्।
जनतामाझ स्वच्छ छवि बनाएका यी दुई व्यक्तित्वको भेटले देश विकासको अभियानमा नयाँ गठबन्धनको सम्भावनालाई बल पुर्याएको छ।
By
By
