काठमाडौं । अविरल वर्षासँगै आएको बाढी तथा पहिरोका कारण प्रभावित बनेका रसुवा र नुवाकोटका परिवारलाई लक्षित गर्दै राहत वितरण अभियान सञ्चालन गरिएको छ।
स्मार्टेन, ह्युल्सा ग्रुप, असिस्टायर तथा अफिलिट्राको आयोजनामा बाढी प्रभावित क्षेत्रमा आवश्यक राहत सामग्री वितरण भइरहेको हो। अभियानअन्तर्गत करिब २ लाख रुपैयाँ बराबरका राहत सामग्री प्रभावित परिवारसम्म पुर्याउने लक्ष्यसहित सहयोग अघि बढाइएको आयोजकले जनाएको छ।
राहत सामग्रीमा खाद्यान्न, पिउने पानी, औषधि, लत्ताकपडा, सरसफाइ सामग्री लगायत प्रभावित परिवारलाई तत्काल आवश्यक पर्ने सामग्री समावेश छन्।
बाढी तथा पहिरोका कारण घरबास, खाद्यान्न तथा दैनिक उपभोग्य सामग्रीको समस्या झेलिरहेका परिवारलाई प्रत्यक्ष सहयोग पुग्ने गरी राहत वितरण गरिएको बताइएको छ। प्रभावित क्षेत्रमा पुगेर स्थानीयको अवस्थाबारे जानकारी लिँदै आवश्यक सामग्री हस्तान्तरण गर्ने कार्यसमेत भइरहेको छ।
मानवीय सेवामा हातेमालो गर्दै विपद्मा परेका परिवारलाई सहयोग गर्नु अभियानको मुख्य उद्देश्य रहेको आयोजक संस्थाहरूले बताएका छन्। राहत वितरण अभियानको सम्पूर्ण गतिविधिबारे मिडिया पार्टनर You TV Nepal ले जानकारी गराएको छ।
सानो सहयोगले पनि विपद्मा परेका परिवारको जीवनमा ठूलो राहत पुग्न सक्छ भन्ने सन्देशसहित अभियानलाई निरन्तरता दिइएको छ।
By
By
