अदालतको आदेशपछि पनि रुंगटा परिवारमाथि प्रतिशोधपूर्ण आरोप? अंकितको कानुनी चेतावनी, राजेन्द्रले दिए जग्गा एकीकरणबारे स्पष्टीकरण
राजविराज । लेनदेनसम्बन्धी मुद्दामा अदालतबाट सफाइ पाएको दाबी गर्दै अंकित रुंगटाले आफू र आफ्नो परिवारविरुद्ध सामाजिक सञ्जालमा प्रतिशोधपूर्ण आरोप लगाएर चरित्र हत्या गर्ने प्रयास भइरहेको गुनासो गरेका छन्। यता, राजेन्द्र कुमार रुंगटाले पैतृक जग्गालाई व्यवस्थित गरी राजविराजलाई व्यापारिक हब बनाउने उद्देश्यले अघि बढाइएको जग्गा एकीकरण प्रक्रियाबारे आफ्नो धारणा सार्वजनिक गरेका छन्।
रुंगटा परिवार पछिल्लो समय लेनदेनसम्बन्धी विवाद, सामाजिक सञ्जालमा सार्वजनिक भइरहेका आरोप तथा जग्गा एकीकरणको विषयलाई लिएर चर्चामा रहेको छ।
राजेन्द्र कुमार रुंगटाका छोरा अंकित रुंगटाले You TV Nepal लाई टेलिफोनिक अन्तर्वार्ता दिँदै अदालतबाट आफूले सफाइ पाइसकेको अवस्थामा पनि केही व्यक्तिहरूले प्रतिशोधको भावना राखेर सामाजिक सञ्जालमा विभिन्न आरोप लगाउने गरेको बताएका छन्।
उनले अदालतको आदेश तथा कानुनी प्रक्रियाको सम्मान गर्नुपर्नेमा आफू र आफ्नो परिवारलाई लक्षित गरी सामाजिक सञ्जालमा आरोप लगाउने तथा प्रतिष्ठामा आँच पुर्याउने गतिविधि भइरहेको गुनासो गरेका छन्।
अंकित रुंगटाले यस्तो गतिविधि अब सह्य नहुने स्पष्ट पार्दै चरित्र हत्या गर्ने व्यक्तिहरूविरुद्ध कानुनी उपचार खोज्ने चेतावनी दिएका छन्।
‘अदालतबाट सफाइ पाइसकेको अवस्थामा पनि सामाजिक सञ्जालमा विभिन्न आरोप लगाएर चरित्र हत्या गर्ने प्रयास भइरहेको छ। यस्तो कार्य अब सहन सकिँदैन। चरित्र हत्या गर्नेहरूविरुद्ध कानुनी ढोका ढकढक्याउनेछु,’ उनले बताएका छन्।
समाजसेवामा सक्रिय तथा राजविराजको सामाजिक क्षेत्रमा परिचित अंकित रुंगटा राष्ट्रिय स्वतन्त्र पार्टी (रास्वपा)सँग निकट रहेको सन्दर्भसमेत सार्वजनिक चर्चामा रहेको छ। उनले व्यक्तिगत प्रतिशोधका आधारमा आफू तथा परिवारलाई लक्षित गर्ने कार्यप्रति असन्तुष्टि व्यक्त गरेका छन्।
राजविराजलाई व्यापारिक हब बनाउने राजेन्द्र रुंगटाको अवधारणा
यसैबीच, राजविराज नगरपालिका वडा नम्बर २ निवासी राजेन्द्र कुमार रुंगटाले पैतृक जग्गालाई व्यवस्थित गर्दै राजविराज शहरलाई व्यापारिक क्षेत्रका रूपमा विकास गर्ने अवधारणासहित आफू अघि बढिरहेको बताएका छन्।
रुंगटाले बिहीबार प्रेस विज्ञप्ति जारी गर्दै राजविराज शहरलाई नयाँ ऊर्जा प्रदान गर्ने उद्देश्यले ग्रण्ड नेपाल रियल स्टेट प्रालिसँग कानुनी सम्झौता गरी नयाँ बजारको अवधारणाअनुसार विभिन्न कित्तामा रहेका जग्गालाई एकीकृत गरिएको स्पष्ट पारेका छन्।
राजविराज नगरपालिका वडा नम्बर २ स्थित आफ्नो जग्गाको किसिम परिवर्तन गरी प्लटिङ गरेर बिक्री गर्न लागेको भन्ने समाचार सार्वजनिक भएपछि उनले विज्ञप्तिमार्फत आफ्नो धारणा स्पष्ट पारेका हुन्।
‘कानुनी प्रक्रिया अनुसार विभिन्न कित्तामा रहेको जग्गालाई एकीकृत गराइएको सन्दर्भमा विभिन्न प्रकारका भ्रम सिर्जना गरिँदैछन्। यसतर्फ सप्तरीवासीको ध्यानाकर्षणका निम्ति हार्दिक अनुरोध गर्न चाहन्छु,’ विज्ञप्तिमा भनिएको छ।
चार पुस्तादेखि राजविराजसँग जोडिएको रुंगटा परिवार
राजेन्द्र रुंगटाले आफ्नो परिवारको ऐतिहासिक पृष्ठभूमि स्मरण गर्दै राणाशासनकालमा हनुमाननगर हुँदै विक्रम संवत् १९९८ सालमा ६० बिघा क्षेत्रफलभित्र जग्गा उपलब्ध गराएर रुंगटा परिवारलाई राजविराजमा बसोबास गराइएको प्रसंग उल्लेख गरेका छन्।
उनका पिता स्वर्गीय गोविन्दराम रुंगटा तत्कालीन समयका स्थापित उद्योगी तथा चर्चित समाजसेवी रहेको उनले स्मरण गराएका छन्। रुंगटा परिवार राजविराजस्थित पविमावि, केअमावि तथा जिल्ला व्यापार संघको संस्थापकसमेत रहेको उल्लेख गर्दै उनले परिवारको शहरसँगको ऐतिहासिक र सामाजिक सम्बन्धलाई स्पष्ट पारेका छन्।
पछिल्लो समय परिस्थितिवश परिवारलाई राजविराज र हनुमाननगरबाट भौतिक रूपमा टाढा बस्नुपर्ने अवस्था आएको भन्दै उनले त्यसलाई गलत रूपमा व्याख्या नगर्न आग्रह गरेका छन्।
‘जीवनमा यस्ता कठिन समयहरू पनि आउँछन्, जतिबेला हामी भावनात्मक रूपमा कठोर बनेर पनि केही निर्णयहरू लिनुपर्ने हुन्छ। तर के हामी भौतिक रूपमा थोरै टाढिँदैमा गैरनागरिक भयौँ त ?’ राजेन्द्र रुंगटाले प्रश्न गरेका छन्।
पछिल्ला चार पुस्तादेखि राजविराजको समाजसँगै बस्दै आएको रुंगटा परिवारलाई गैरनागरिकको रूपमा व्याख्या गर्न मिल्ने वा नमिल्ने विषयमा समेत उनले प्रश्न उठाएका छन्।
केही दिनयता रुंगटा परिवारका सदस्यहरू दुई देशको नागरिक रहेको भन्ने समाचार सञ्चारमाध्यममा सार्वजनिक भएको थियो। उक्त विषयमा उनले परिवारको ऐतिहासिक, सामाजिक तथा स्थानीय सम्बन्धलाई स्मरण गराउँदै आफ्नो धारणा स्पष्ट पारेका हुन्।
आरोप–प्रत्यारोपबीच रुंगटा परिवारको कानुनी चेतावनी
एकातिर राजविराजलाई व्यापारिक हब बनाउने उद्देश्यसहित जग्गा एकीकरणको अवधारणा अघि बढाइएको राजेन्द्र रुंगटाको भनाइ छ भने अर्कोतर्फ अंकित रुंगटाले आफू र परिवारमाथि सामाजिक सञ्जालमार्फत प्रतिशोधपूर्ण आरोप लगाइएको गुनासो गरेका छन्।
अंकितले आफूविरुद्ध भइरहेको भनिएको चरित्र हत्या रोक्न कानुनी उपचार खोज्ने चेतावनी दिएका छन्। राजेन्द्रले पनि जग्गा एकीकरण प्रक्रियाबारे फैलाइएको भनिएको भ्रमप्रति आपत्ति जनाउँदै आफ्नो धारणा सार्वजनिक गरेका छन्।
रुंगटा परिवारले सार्वजनिक रूपमा आफ्नो पक्ष स्पष्ट पारेको छ। यद्यपि, विवादसँग सम्बन्धित अन्य पक्षको प्रतिक्रिया तथा अदालतको आदेशको आधिकारिक विवरण सार्वजनिक भएपछि घटनाको थप तथ्य स्पष्ट हुने देखिन्छ।
By
By
