वीरगंज — पर्सा जिल्लाका प्रमुख जिल्ला अधिकारी (सीडिओ) तोयनारायण सुवेदीको अध्यक्षतामा शनिबार बसेको जिल्ला सुरक्षा समितिको बैठकले जिल्लाको समग्र शान्ति–सुरक्षा अवस्थाबारे समीक्षा गर्दै आगामी रणनीति तय गरेको छ। बैठकले जिल्लाको सुरक्षा अवस्था क्रमशः सुधारोन्मुख रहेको निष्कर्ष निकाल्दै सुरक्षा निकायहरूबीच आपसी समन्वयलाई अझ प्रभावकारी बनाउने निर्णय गरेको हो।
स्थानीय प्रशासन ऐन, २०२८ को दफा ६ (ख) बमोजिम जारी गरिएको कर्फ्यू आदेशलाई संशोधन गर्दै जितिया पर्वलाई ध्यानमा राखी नयाँ समय तालिका अनुसार बिहान ५:०० बजेदेखि साँझ ९:०० बजेसम्म निषेधाज्ञा जारी हुनेछ भने साँझ ९:०० बजेबाट बिहान ५:०० बजेसम्म कर्फ्यू लागू गरिने निर्णय गरिएको छ। यस अवधिमा पाँच जना वा सोभन्दा बढी व्यक्तिहरूको भेला, सभा, जुलुस, प्रदर्शन, घेराउ लगायतका क्रियाकलाप पूर्ण रूपमा निषेध गरिएको छ।
कर्फ्यू तथा निषेधाज्ञा वीरगंज महानगरपालिकाको पूर्व बाईपास रोड, पश्चिम सिर्सिया पुल, उत्तर गण्डक चौक र दक्षिण शंकराचार्य गेट भित्रको क्षेत्रफलमा लागू हुने छ। बैठकले सुरक्षा व्यवस्थाका लागि नेपाली सेनाको श्री श्रीजंग गण, पर्साको सहयोग लिने निर्णय पनि गरेको छ।
यस्तै, हालै सम्पन्न जेन–जी आन्दोलनका क्रममा पर्साका विभिन्न स्थानहरूमा फिर्ता गरिएका प्रहरी चौकीहरूलाई अवस्थाको मूल्यांकन गर्दै क्रमशः पुनः सञ्चालनमा ल्याउने निर्णय लिइएको छ। साथै, आन्दोलनका क्रममा भएको क्षतिको विवरण गृह मन्त्रालयमा दुई दिनभित्र पठाउने निर्णयसमेत गरिएको छ।
बैठकमा प्रमुख सेनानी लोकेन्द्र कार्की, प्रहरी उपरीक्षक गौतम मिश्र, सशस्त्र प्रहरी उपरीक्षक पुरन चन्द्र भट्ट लगायतका जिल्ला सुरक्षा निकायका प्रमुखहरूको उपस्थिति रहेको थियो।
By
By
By
