सहिद स्मारक ए डिभिजन लिगः छैटौं चरणका खेलहरु आजबाट सुरु हुँदै

काठमाडौं, चैत २० गते । आजबाट सहिद स्मारक ए डिभिजन लिग फुटबलको छैटौं चरणका खेलहरु सुरु हुँदैछ ।लिगको छैटौं चरण अन्तर्गत सोमबार दुई खेलहरु हुँदैछ । जसमा एक खेल च्यासल मैदान र एक खेल एन्फा कम्प्लेक्समा हुनेछ ।

च्यासल मैदानमा दुई विभागीय टोली एपीएफ क्लब र नेपाल पुलिस क्लब प्रतिस्पर्धा गर्ने छन् । विभागीय डर्बी भिडन्त दिउँसो २ बजे सुरु हुनेछ ।
एपीएफ आज तेस्रो जितको खोजीमा हुनेछ । एपीएफ ७ अंक जोडेर छैटौं स्थानमा रहेको छ ।पुलिस लिगमा पहिलो जितको खोजीमा हुनेछ । पाँचौं चरणसम्म जित विहीन पुलिस पहिलो ३ अंकको योजनामा रहेको छ । पुलिस १ अंक जोडेर पुछारमा रहेको छ ।

यस्तै एन्फा कम्प्लेक्समा संकटा क्लब र एफसी खुमलटारबीच प्रतिस्पर्धा हुनेछ । संकटा र खुमलटारबीचको खेल दिउँसो २ बजे सुरु हुनेछ ।संकटा दोस्रो जितको योजनामा हुनेछ । संकटा ५ खेलमा ६ अंक जोडेर आठौं स्थानमा रहेको छ ।खुमलटार तेस्रो जितको खोजीमा हुनेछ । खुमलटार ६ अंक जोडेर नवौं स्थानमा रहेको छ ।