सशस्त्र प्रहरी जवानले किशोरी भगाएको आरोपमा पक्राउ घटनाबारे थप अनुसन्धान भइरहेको छ!

सुनसरीको भोक्राहा नरसिंह गाउँपालिका–८ शिशुवाकी एक १५ वर्षीया किशोरीलाई प्रेम सम्बन्धको बहानामा भगाएको आरोपमा सशस्त्र प्रहरी जवान पक्राउ परेका छन्।
प्राप्त जानकारी अनुसार हरिनगर गाउँपालिका–५ स्थित सशस्त्र प्रहरी बलको बोर्डर आउट पोस्ट (बिओपी) बसन्तपुरमा कार्यरत प्रहरी जवान मनोज कुमार गणेशमाथि नाम परिवर्तन गरिएको ‘सपना’ नामकी किशोरीलाई ललाइफकाई आफ्नो साथमा लगेको आरोप लागेको हो।
घटनाबारे जानकारी पाएपछि पीडित परिवार तथा स्थानीयवासी आक्रोशित बनेका थिए। उनीहरूले प्रहरी चौकी शिशुवालाई घेराउ गर्दै आरोपित जवानलाई नियन्त्रणमा लिन र किशोरीलाई तत्काल सार्वजनिक गर्न माग गरेका थिए। स्थानीयको दबाबपछि क्षेत्र केही समय तनावग्रस्त समेत बनेको बताइएको छ।
पीडित परिवारका अनुसार आरोपित जवानले किशोरीलाई इटहरी क्षेत्रमा राखिएको जानकारी दिए पनि उनको यकिन स्थान खुलाउन नसकेपछि परिवार झनै चिन्तित बनेको छ। परिवारले किशोरीको सकुशल उद्धार गरी तत्काल सार्वजनिक गर्न प्रहरी प्रशासनसँग माग गरेको छ।
घटनाको गम्भीरतालाई ध्यानमा राख्दै जिल्ला प्रहरी कार्यालय सुनसरीले आरोपित जवानलाई नियन्त्रणमा लिएर अनुसन्धान प्रक्रिया अघि बढाएको जनाएको छ। प्रहरी स्रोतका अनुसार किशोरीको खोजी तथा उद्धारका लागि विशेष टोली परिचालन गरिएको छ। किशोरी फेला परेपछि उनको बयान तथा प्राप्त तथ्य–प्रमाणका आधारमा थप कानुनी प्रक्रिया अघि बढाइने जनाइएको छ।
स्थानीयवासीहरूले सीमा सुरक्षाको जिम्मेवारीमा रहेका सुरक्षाकर्मीहरूमाथि बेला–बेलामा यस्ता आरोपहरू सार्वजनिक हुँदा सुरक्षासंस्थाप्रतिको जनविश्वासमा असर पर्ने गरेको बताएका छन्। उनीहरूले घटनाको निष्पक्ष छानबिन गरी सत्यतथ्य सार्वजनिक गर्न तथा दोषी प्रमाणित भए कानुनबमोजिम कडा कारबाही गर्न माग गरेका छन्।
उल्लेखनीय रूपमा यसअघि पनि हरिनगर गाउँपालिका–७ क्षेत्रमा कार्यरत सशस्त्र प्रहरीका एक जवानमाथि स्थानीय युवतीसँग दुर्व्यवहार गरेको आरोप सार्वजनिक भएको थियो। यस घटनापछि पनि सुरक्षाकर्मीहरूको आचरण र जिम्मेवारीबारे स्थानीय स्तरमा चर्चा सुरु भएको छ।
प्रहरीले भने हाल घटनाबारे अनुसन्धान जारी रहेकाले कुनै निष्कर्षमा पुग्न हतार नगर्न आग्रह गर्दै तथ्य र प्रमाणका आधारमा आवश्यक कानुनी कारबाही अगाडि बढाइने जनाएको छ।