१३ पुस, काठमाडौं
वीरगञ्जका उद्योगी व्यवसायीले बुधबार चौथो दिनपनि आन्दोलनलाई जारी राखेका छन् । उनीहरुले नेपाल राष्ट्र बैंक वीरगञ्ज शाखा अगाडि दुई घण्टा धर्ना दिनुका साथै हातमा कालोपट्टी बाँधेर विरोध जनाएका हुन् ।
बैंकको चर्को ब्याज दर र राष्ट्र बैंकले १ कात्तिकदेखि लागु गरेको चालु पूँजी कर्जा मार्गदर्शनले व्यापार व्यवसाय धरासायी भएको भन्दै वीरगञ्ज उद्योग वाणिज्य संघको नेतृत्वमा आन्दोलन भइरहेको छ । बुधबार बिहान ११ बजेदेखि दिउँसो १ बजेसम्म राष्ट्र बैंक अगाडि धर्नामा बसेको उद्योग वाणिज्य संघका मनोज उपाध्यायले जानकारी दिए ।
नेपाल राष्ट्र बैंकको गलत आर्थिक नीतिले बजार व्यवसाय तहसनहस भएको आरोप उद्योगी व्यवसायीको छ । राष्ट्र बैंकको गलत मौद्रिक नीति र फितलो अनुगमनको कारण देखाएर अधिकांश वाणिज्य बैंकहरुले तरलताको अभाव देखाएर मनोमानी किसिमले ब्याज वृद्धि गरिरहेको गुनासो उनीहरुको छ ।
नीतिगत जटिलतालाई समाधान गर्न पटक पटक सरोकारवालाई आग्रह गर्दा बेवास्ता गरेपछि आन्दोलन गर्न बाध्य भएको वीरगञ्ज उद्योग वाणिज्य संघका उपाध्यक्ष हरिप्रसाद गौतमले बताए ।
वीरगञ्ज उद्योग वाणिज्य संघबाट निस्केको र्यालीले वीरगञ्ज नगरको परिक्रमा पछि राष्ट्र बैंकको अगाडि पुगी धर्नामा परिणत भएको थियो । उद्योगी व्यवसायीले चर्को ब्याज दर फिर्ता लिन र चालु पूँजी कर्जा मार्गदर्शन अव्यवहारिक रहेकोले परिमार्जन गरी निजीक्षेत्र मैत्री बनाउन माग उनीहरुले राखेका छन् ।
नेपाल उद्योग वाणिज्य महासंघ मधेश प्रदेश समितिका अध्यक्ष गणेश लाठले शान्तिपूर्ण आन्दोलनलाई समान्य रुपमा नलिन चेतावनी दिए । ‘नेपाल सरकारलाई निजी क्षेत्र खत्तम छ । करङ नभएको मान्छे जस्तै छ भन्ने भ्रम परेको छ,’ उनले भने, ‘हामी भित्र धैर्यता छ । त्यसैले नेपालभर सभ्य र भव्य आन्दोलन चल्दैछ । मौन आन्दोलनलाई सामान्य ठान्दा अवस्था बिग्रन पनि सक्छ ।’
उनले उद्योगपति व्यापारीलाई उदण्ड बन्न बाध्य नपार्न आग्रह गरे । आन्दोलनपछि आफूहरु पुस मसान्तको राजस्व बुझाउन राजश्व कार्यालय, भन्सारको माल छुटाउन भन्सार कार्यालय गएर जिम्मेवारी बुझेर काम गरिरहेको उनले बताए ।
मंगलबार उद्योगी व्यवसायीले वीरगञ्जको बजार क्षेत्रमा कालो ब्यानरमा ‘हामी आन्दोलनमा छौं’ लेखेर टाँगेका थिए ।
By
By
