नागढुंगा-नौबिसे सडक दैनिक ५ घण्टा बन्द, निर्माण कार्यलाई तीव्रता दिइने

काठमाडौँ – नागढुंगा-नौबिसे सडकखण्डमा निर्माण कार्यलाई अपेक्षित गति दिन सरकारले यो सडकखण्ड दैनिक ५ घण्टा बन्द गर्ने निर्णय गरेको छ। बुधबारदेखि आगामी पुस १ गतेसम्म बिहान १०ः३० बजेदेखि अपराह्न ३ः३० बजेसम्म सडक आवागमन पूर्ण रूपमा बन्द रहनेछ।

भौतिक पूर्वाधार तथा यातायात मन्त्रालयले निर्माण व्यवसायी र आयोजना पक्षसँगको छलफलपछि यो निर्णय लिएको हो। निर्माण कार्य भइरहेको अवस्थामा सवारीसाधनको निरन्तर आवागमनले गति लिन नसकेको गुनासो आएपछि ट्राफिक व्यवस्थापन गरी कामलाई तीव्रता दिन यो कदम चालिएको हो।

जिल्ला प्रशासन कार्यालय काठमाडौँ र धादिङले संयुक्त रूपमा प्रकाशित गरेको सूचनाअनुसार त्रिभुवन राजपथको नागढुङ्गा-नौबिसे सडकखण्डको कालोपत्रे र स्तरोन्नति सम्पन्न गर्ने चरणमा रहेको छ।

कुन क्षेत्रमा बन्द हुन्छ?

सडक बन्द हुने क्षेत्रहरू निम्न छन्:

नागढुंगादेखि पिप्लामोडसम्म: यो खण्ड साँघुरो भएकाले एकै पटकमा धेरै उपकरण परिचालन गर्नुपर्ने भएकाले बन्द गर्न लागिएको हो।
पोखरेभीर क्षेत्र: धादिङको गल्छी–गजुरी खण्डमा यो क्षेत्र साँघुरो र जोखिमपूर्ण रहेकाले सडक चौडा गर्न बन्द गरिनेछ।

यात्रुहरूलाई आग्रह र वैकल्पिक मार्ग

सडक बन्दको समयमा यात्रुहरूलाई वैकल्पिक मार्ग प्रयोग गर्न वा यात्रा समयलाई बिहान १०ः३० भन्दा अगाडि वा ३ः३० बजेपछि व्यवस्थापन गर्न आग्रह गरिएको छ।

वैकल्पिक मार्गहरू (साना तथा मझौला सवारीसाधनका लागि):
- सीतापाइला भिमढुङ्गा, रामकोट धार्के सडक
- सामाखुसी टोखा–छहरे सडक
काठमाडौँबाट नौबिसेतर्फ जाने सवारी साधनहरू नागढुङ्गा चेकपोस्टमा रोकिनेछन्।
मुग्लिङबाट काठमाडौँतर्फ जाने सवारी साधनहरू खानीखोला (नौबिसे), जुंगेखोला (थाक्रे), गल्छी, बैरेनी र मासटारमा रोकिनेछन्।
रोकिएका सबै सवारीसाधनहरूलाई अपराह्न ३ः३० बजेपछि मात्र छाडिनेछ।

अत्यावश्यक सेवाका सवारीसाधन: अत्यावश्यकीय प्रकृतिका एम्बुलेन्स, सुरक्षा निकायका सवारी साधन, दमकल, शव वाहन जस्ता सवारीसाधनको आवागमन ट्राफिक प्रहरीको सहजीकरणमा सञ्चालन गर्न दिइनेछ।

यो बन्दले गर्दा यस अवधिमा यात्रा गर्नेहरूलाई आफ्नो गन्तव्यमा पुग्न ढिलाइ हुन सक्ने भएकाले समय व्यवस्थापनमा विशेष ध्यान दिनु जरुरी छ।