जनताले अनुभूति गर्ने गरी आर्थिक समृद्धि हुनसकेन–‘प्रचण्ड

काठमाडौं, २६ कात्तिक । नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ले हँसिया हथौडा र रुखबीच सम्झौता भएर नै देशमा गणतन्त्र र नयाँ संविधान सम्भव भएको बताएका छन् । प्रचण्ड क्षगोरखा क्षेत्र नं २ का प्रतिनिधिसभा सदस्य पदका उमेदवार हुन । चुनाव प्रचार–प्रसारका लागि गोरखामा रहेका उनले पालुङटार नगरपालिकामा आज बिहान आयोजित कार्यक्रमलाई सम्बोधन गर्दै अब रुखले हँसिया हथौडा र हँसिया हथौडाले रुखमा मतदान गर्न हिच्किचाउनु नपर्ने बताएका छन् ।

अध्यक्ष दाहालले कांग्रेस र माओवादी मिलेर गणतन्त्र र संविधान सम्भव भएजस्तै अब विकास र समृद्धि पनि दुवै दल मिलेर नै गर्न सहज हुने बताएका छन् ।उनले राजनीतिक परिवर्तन भए पनि जनताले अनुभूति गर्ने गरी आर्थिक समृद्धि हुन नसकेको बताएका छन् । उनले अब राजनीतिक परिवर्तनको रक्षा र आर्थिक क्रान्तिको थालनी गर्नुपर्छ भन्ने गठबन्धनका नेताले गहनरुपले अनुभूति गरिसकेको जिकिर गरेका छन् । अध्यक्ष दाहालले लामो समयदेखि बन्द रहेको पालुङटार एअरपोर्ट भिन्न रूपमा सञ्चालन गर्ने आफ्नो योजना रहेकोसमेत बताएका छन् ।