राष्ट्रको गरिमालाई माथि उठाउन चाहने व्यक्तिहरूको कुरा नसुन्दा एमालेमा अहिलेको अवस्था आएको हो –माधवकुमार नेपाल

काठमाडौं । पुष १९ गते
मूर्तिलाई नढोग्नेहरूले ‘आई लभ यू केपी बा’ भनिरहेको नेकपा (एकीकृत समाजवादी)का अध्यक्ष माधवकुमार नेपालले टिप्पणी गर्नु भएको छ । सुनसरीको इटहरीमा आयोजित अनेरास्ववियु प्रदेश १ को अधिवेशन उद्घाटन गर्दै अध्यक्ष नेपालले मूर्तिलाई नढोग्नेहरूले आई लभ यू केपी बा भनिरहेको उल्लेख गर्नु भएको थियो ।

उहाँले व्यक्तिको देवत्वकरण भइसकेपछि त्यो व्यक्तिले आफूलाई देवता ठान्ने भन्दै नेकपा एमालेका अध्यक्ष केपी शर्मा ओलीले पनि दम्भ र निरंकुशताको प्रवृत्ति देखाएको बताउनु भएको थियो । अध्यक्ष नेपालले १५ वर्षसम्म आफ्नो मातहतमा रहेकाले नै आफ्नो निवेदन र आग्रह नसुनेको गुनासो गर्नु भएको भएको थियो ।

अध्यक्ष नेपालले स्वतन्त्र चिन्तन, आफ्नो विचार, धारणा राख्न चाहनेहरू, पार्टीको भलाइ सोच्नेहरू, समाजको परिवर्तनमा जुट्नेहरू, नेपाल राष्ट्रको गरिमालाई माथि उठाउन चाहने व्यक्तिहरूको कुरा नसुन्दा एमालेमा अहिलेको अवस्था आएको बताउनु भएको थियो ।