पूर्व मन्त्री यादव: घर जेनजीले होइन, घुसपैठीले जलायो

वीरगंज – जसपा उपमहासचिव एवं पूर्व खानेपानी मन्त्री प्रदीप यादवले आफ्नो घर जेनजी आन्दोलनकारीले नभई नियतवश घुसपैठीले जलाएको दाबी गर्नुभएको छ। जेनजी आन्दोलनपछि पहिलोपटक पर्सा पुगेका यादवले पत्रकारहरूसँग कुरा गर्दै आफू युवाहरूको नेता भएको र आन्दोलनको सुरुदेखि नै समर्थन गर्दै आएको स्पष्ट पार्नुभयो।

उहाँले भन्नुभयो, “राज्यले आन्दोलनमा गरेको दमनका समाचार सुनेर म रातभर सुत्न सकिनँ। यही कारण २३ गते राति मन्त्री पदबाट राजीनामा दिएँ।” घर जलाइएको विषयमा यादवले थप्नुभयो, “म भ्रष्टाचारमा संलग्न छैन। बाउबाजेको सम्पत्ति र व्यवसायबाट बनेको घरमा आगजनी भयो। अहिले छिमेकीको घरमा बस्नुपरेको छ।”

उहाँले जेनजी आन्दोलनकारीबारे स्पष्ट गर्दै भन्नुभयो, “म सानै उमेरका युवाहरूको नेतृत्वको पक्षमा छु। घर जलाउनेहरू नियोजित ढंगले घुसपैठी हुन्। उनीहरूको पहिचान भइसकेको छ, तर म प्रतिशोधको राजनीति गर्ने पक्षमा छैन।” वीरगंजवासीलाई सचेत रहन यादवले आग्रह गर्दै भन्नुभयो, “आगजनी निन्दनीय छ, यसको मूल्याङ्कन भगवानले गर्नुहुनेछ।” यादवले देशको संघीयता, लोकतन्त्र र पहिचान जोगाउन जेनजी पुस्तालाई अग्रसर रहनुपर्नेमा जोड दिनुभयो र आफू सधैं युवाहरूको पक्षमा रहने प्रतिबद्धता व्यक्त गर्नुभयो।