काठमाडौँ — गत भदौ २३ र २४ गते काठमाडौँमा भएको जेन-जी आन्दोलनका क्रममा आगजनी र तोडफोडमा संलग्न भएको अभियोगमा पक्राउ परेकामध्ये ४८ जनाको आपराधिक पृष्ठभूमि रहेको खुलेको छ।
जिल्ला प्रहरी परिसर काठमाडौँले मुद्दा चलाएका कूल २९८ जनामध्ये यी ४८ जना यसअघि पनि विभिन्न आपराधिक कार्यमा संलग्न भई पक्राउ परेका र मुद्दा दर्ता भएका प्रतिवादीहरू रहेको जिल्ला प्रहरी परिसर काठमाडौँका सूचना अधिकारी प्रहरी उपरीक्षक पवनकुमार भट्टराईले जानकारी दिए।
आपराधिक पृष्ठभूमिको विवरण
पक्राउ परेका ४८ जनाको आपराधिक पृष्ठभूमि र उनीहरूमाथि हाल अनुसन्धान भइरहेका कसुरको विवरण निम्नानुसार छ:
-
कर्तव्य ज्यान सम्बन्धी कसुर: ४ जना
-
आपराधिक उपद्रव सम्बन्धी कसुर: २८ जना
-
चोरी सम्बन्धी कसुर: ४ जना
-
अभद्र व्यवहार सम्बन्धी कसुर: १ जना
-
हातहतियार सम्बन्धी कसुर: ७ जना
-
ज्यान मार्ने उद्योग सम्बन्धी कसुर: १ जना
-
आपराधिक उपद्रव र चोरी सम्बन्धी दुबै कसुर: १ जना (माथिका विवरणमा समावेश)
प्रहरी उपरीक्षक भट्टराईका अनुसार यी व्यक्तिहरू विरुद्ध यसअघि पनि ज्यान मार्ने, अभद्र व्यवहार, आपराधिक उपद्रव, सार्वजनिक अपराध, किर्ते, बैंकिङ कसुर, लागुऔषध, कुटपिट–अंगभंग, चोरी, ठगीजस्ता विभिन्न गम्भीर मुद्दाहरू दर्ता भएको पाइएको छ।
जेन-जी आन्दोलनका नाममा भएको आगजनी र तोडफोडमा आपराधिक इतिहास भएका व्यक्तिहरूको संलग्नताले आन्दोलनको उद्देश्य र प्रकृतिका बारेमा थप प्रश्नहरू खडा गरेको छ। प्रहरीले पक्राउ परेका सबैमाथि आवश्यक अनुसन्धान गरिरहेको छ।
By
By
