वीरगंज – पर्सा प्रहरी प्रमुख सुदिपराज पाठकको नेतृत्व आएपछि एक महिनाको अवधिमै अपराध नियन्त्रण, अवैध गतिविधि रोकथाम र सीमाक्षेत्र निगरानीमा उल्लेखनीय प्रगति भएको पर्सा प्रहरीले कार्यसम्पादन प्रतिवेदन सार्वजनिक गर्दै जनाएको छ। कार्तिक ७ देखि मंसिर ७ सम्मको प्रतिवेदनअनुसार प्रहरी अभियानहरू लगातार प्रभावकारी देखिएका छन्।
फरक–फरक मुद्दामा फरार रहेका १८४ जना प्रतिवादी पक्राउ परेका छन्। उनीहरूबाट ६ लाख २ हजार ३१९ रुपैयाँ जरिवाना असुल गरिएको छ भने १८ वर्ष १ महिनाको कैद सजाय पनि कार्यान्वयन गरिएको छ। भन्सार छलीका खाद्यान्न, कपडा तथा अन्य सामान गरी ३ करोड ७५ लाख ५० हजार ५५६ रुपैयाँ बराबरका सामग्री बरामद गरिएको छ।
लागुऔषध नियन्त्रणमा २७.४ किलो गाँजा बरामद भएको छ र चार जना पक्राउ परेका छन्। प्रहरीले ५ सय लिटर घरेलु मदिरा नष्ट गरेको छ भने अवैध बालुवा उत्खननमा प्रयोग भएका पाँच ट्र्याक्टर नियन्त्रणमा लिएको छ। वन अपराधतर्फ ६१.५ क्युबिक फिट सालको काठ बरामद गरिएको छ।
एक महिनामा हराइएका सात बालिका र दुई महिलालाई फेला पारी अभिभावकलाई जिम्मा गरिएको छ भने थप दुई बालिकाको उद्धार गरिएको हो।
प्रहरीले आगामी दिनमा अपराध नियन्त्रण र सीमाक्षेत्र सुरक्षा अझ कडाइका साथ अघि बढाइने प्रतिबद्धता व्यक्त गरेको छ।
By
By
