वीरगंज – एनप्याब्सन नगर कार्य समिति, वीरगंजका अध्यक्ष जियालाल गुप्तालाई वीरगंज महानगरपालिका नगर शिक्षा समितिको विशेष आमन्त्रित सदस्यमा मनोनयन गरिएको छ। महानगर प्रमुख राजेशमान सिंहको अध्यक्षतामा बसेको बैठकले उनलाई १ वर्षका लागि यो पदमा मनोनयन गरेको हो।
नगर प्रमुख सिंहका अनुसार, निजी विद्यालय क्षेत्रबाट गुणस्तरीय शिक्षा प्रदान गर्दै आएका गुप्ताले शिक्षा क्षेत्रमा उल्लेखनीय योगदान दिँदै आएका छन्। उहाँको सक्रियता र अनुभवले नगरभित्रको शैक्षिक सुधारमा नयाँ ऊर्जा थप्ने अपेक्षा गरिएको उनले बताए।
महानगरपालिकाको शिक्षा नियमावली २०७४ को नियम २४(१)(ज) अनुसार विशेष आमन्त्रित सदस्यको रूपमा गुप्तालाई मनोनयन गरिएको हो। लामो समयदेखि एनप्याब्सन (NPABSON) संस्थामा नेतृत्वदायी भूमिका निर्वाह गर्दै आएका गुप्तालाई यो भूमिकाले थप जिम्मेवारी दिएको नगर प्रमुख सिंहको भनाइ छ।
नयाँ जिम्मेवारी पाएपछि अध्यक्ष गुप्ताले भने, “शिक्षा क्षेत्रमा अझ गुणस्तरीय सुधार ल्याउनेतर्फ म पूर्ण समर्पित रहँदै आफ्नो भूमिकाबाट जति सक्दो योगदान दिनेछु।” उनले वीरगंज महानगरपालिकाले विगत केही वर्षयता निजी तथा सामुदायिक विद्यालयबीच सहकार्यमा आधारित शिक्षा प्रणाली सुदृढीकरणमा दिएको ध्यानलाई प्रशंसा गर्दै आफ्नो मनोनयनले उक्त प्रयासलाई थप बल दिने विश्वास व्यक्त गरे।
By
By
By
