वीरगंजमा सशस्त्र प्रहरीले भारतबाट ल्याइँदै गरेको ४ हजार प्रतिबन्धित कुखुराका चल्ला बरामद

वीरगंज – सशस्त्र प्रहरीले वीरगंजमा अवैध रूपमा भारततर्फबाट ल्याइँदै गरेको ४ हजार बोईलर कुखुराका चल्ला बरामद गरेको छ। वीरगंज महानगरपालिका–१९ केहुनियास्थित सशस्त्र प्रहरी बल नं. १३ गणको मोबाइल टोलीले मोटरसाइकलमा लोड गरी नेपालतर्फ ल्याइँदै गरेको चल्लालाई नियन्त्रणमा लिएको हो।

शुक्रबार बिहान करिब ६:०० बजे सशस्त्र प्रहरी सहायक निरीक्षक संजिव कुमार यादवको कमाण्डमा खटिएको सात जनाको टोलीले ना ४१ प ४२२ नम्बरको मोटरसाइकलमा लोड भएको चल्ला बरामद गरेको सशस्त्र प्रहरी बल नं. १३ गण, पर्साले जनाएको छ। उक्त चल्लाको अनुमानित मूल्य एक लाख रुपैयाँ रहेको छ।

बरामद कुखुराका चल्ला स्थानीय पत्रकार, जनप्रतिनिधि, नेपाल प्रहरी तथा पशु क्वारेन्टिनका प्रतिनिधिहरूको रोहबरमा गण परिसरभित्र खाडल खनी पुरेर नष्ट गरिएको छ। बरामद मोटरसाइकलको भन्सार बुझाउने प्रक्रिया भने अगाडि बढाइएको छ।

सशस्त्र प्रहरी बल नम्बर १३ गण, पर्साका सूचना अधिकारी प्रहरी नायब उपरीक्षक सुरज कार्कीले यसबारे जानकारी दिएका छन्।