समाचार

वीरगंज – जेन–जी युवा आन्दोलनका क्रममा वीरगंज महानगरपालिकाको कार्यालयमा आगजनी र तोडफोड भएर सेवा प्रवाह प्रभावित भएको अवस्थामा निजी तथा आवासीय विद्यालयका छाता संगठन—प्याब्सन, एन–प्याब्सन र हिसन—ले संयुक्त रूपमा लाखौँ रुपैयाँ बराबरका फर्निचर तथा कम्प्युटर सामग्री महानगरलाई सहयोग गरेका छन्।

बुधवार प्याब्सन महानगर अध्यक्ष राहुल श्रीवास्तवको नेतृत्वमा टेबल, कुर्सी, क्याबिनेट, कम्प्युटर, प्रिन्टरदेखि विभिन्न आवश्यक उपकरणहरू महानगर उपमेयर इम्तियाज आलम, प्रमुख प्रशासकीय अधिकृत अरविन्दलाल कर्ण, शिक्षा महाशाखा प्रमुख आनन्द लामिछाने र सूचना अधिकारी सुनिल कर्णलाई औपचारिक रूपमा हस्तान्तरण गरिएको थियो।

जेन–जी आन्दोलनपछि कार्यालय सञ्चालनमा गम्भीर कठिनाइ उत्पन्न भएको भन्दै नगर प्रमुख राजेशमान सिंहले विभिन्न संघ–संस्थाहरूसँग सहयोगको अपिल गरेका थिए। सोही अनुरोधअनुसार तीनवटै संगठनले तत्काल राहत उपलब्ध गराएको प्याब्सन महानगर अध्यक्ष श्रीवास्तवले जानकारी दिए।

प्याब्सन पर्साका जिल्ला अध्यक्ष सरोज प्रसाद चौधरीले महानगरले भोगिरहेको समस्याको खबर पाएलगत्तै तीनवटै संगठनले संयुक्त बैठक बसेर सहयोग जुटाउने निर्णय गरेको बताए। “हाम्रा विद्यार्थीका अभिभावक पनि यही सहरका बासिन्दा हुन्। महानगरले सेवा दिन नसके हामीलाई पनि असर पर्छ। यो सहयोग हाम्रो सामाजिक उत्तरदायित्व पनि हो,” चौधरीले भने।

त्यस्तै, एन–प्याब्सन वीरगंज महानगर अध्यक्ष जियालाल गुप्ताले आन्दोलनका कारण सिर्जित असहज परिस्थितिमा सबै मिलेर अघि बढ्नुपर्ने आवश्यकता औंल्याउँदै भने, “हामीले राजनीति होइन, सहरको हित हेरेका हौँ। महानगर बलियो भयो भने हाम्रा विद्यालय र विद्यार्थीको भविष्य पनि बलियो हुन्छ।”

उपमेयर आलमले कठिन परिस्थितिमा गरिएको सहयोगले महानगरको सेवा प्रवाह पुनःसञ्चालनमा ठूलो योगदान पुर्‍याएको बताए। महानगरले क्षतिग्रस्त संरचना पुनर्निर्माण र उपकरण व्यवस्थापनलाई प्राथमिकतामा राखेर कार्य अघि बढाइरहेको छ।

कार्यक्रममा प्रमुख प्रशासकीय अधिकृत अरविन्दलाल कर्ण, शैक्षिक प्रशासन महाशाखा प्रमुख आनन्द लामिछाने, प्याब्सनका वरिष्ठ उपाध्यक्ष सुशीला साह, उपाध्यक्ष वीरेन्द्र यादव, सचिव अशोक सङ्ग्रौला, प्याब्सन वीरगंजका प्रमुख सलाहकार आलोक चौरसिया, सचिव अमित आलोक, सदस्य बिजय बल र हिसान पर्साका अध्यक्ष मुकेश गुप्तालगायतको उल्लेखनीय उपस्थिति रहेको थियो।

You Might Also Like

रवि लामिछाने र छविलाल जोशीको सहकारी ठगी मुद्दा उच्च अदालतको सुनुवाइमा

५ महिना अगाडि

बैंकमा 'तरलताको बाढी' तर कर्जा बजार सुक्खा 📉

५ महिना अगाडि