२१ पुस, काठमाडौं । फारवेस्ट युनाइटेडले नेपाल टी-२० क्रिकेटमा दोस्रो जित हात पार्ने क्रममा बिहीबार काठमाडौं नाइट्सलाई ८३ रनले पराजित गरेको छ ।
फारवेस्टले दिएको १९८ रनको लक्ष्य पछ्याएको काठमाडौंले निर्धारित २० ओभरमा ११४ रनमात्र बनाउन सक्यो । काठमाडौंका लागि तीव्र गतिका बलर कमल सिंह ऐरीले सर्वाधिक २०, कप्तान ज्ञानेन्द्र मल्ल र सन्दीप रजालीले १७/१७, ओपनर विरनदिप सिंहले १४ र सुनम गौतम १६ रन बनाए ।
फारवेस्टको लागि दुर्गेश गुप्ता, करण केसी र हस्मुतुल्लाह शहिदीले २/२ विकेट लिए भने शेर मल्ल र प्रकाश जैशीले १-१ विकेट लिए ।
कीर्तिपुरस्थित त्रिवि क्रिकेट मैदानमा टस जितेर ब्याटिङ गरेको फारवेस्टले निर्धारित २० ओभरमा ४ विकेट गुमाउँदै १ सय ९७ रन बनाएको थियो ।
फारवेस्टका ओपनरद्वय शाहिदी र भण्डारीले उत्कृष्ट ब्याटिङ गरे । शाहिदीले पहिलो विकेटका लागि भण्डारीसँग १ सय ५७ रनको साझेदारी गरे । जुन जारी नेपाल टी-२० लिगको सबैभन्दा धेरै रनको साझेदारी हो । १६.३ ओभरमा अविनाश बोहराको बलमा क्याचआउट हुनु अघि भण्डारीले ४४ बलमा ६ चौका र ५ छक्कासहित ७३ रन जोडे ।
शाहिदीले ५७ बलमा ५ चौका र ४ छक्कासहित ७६ रन जोडे । करण केसी २२ रनमा अविजित रहे ।
काठमाडौंका वसिर अहमदले ४ ओभरमा २४ रन खर्चिएर तीन विकेट लिए । अविनाश बोहराले एक विकेट लिए ।
प्रतियोगितामा ८ खेल खेलेको फारवेस्ट ६ हार र २ जितसहित ४ अंकका साथ तालिकाको पुछारमा छ । यद्यपि उसले प्लेअफमा पुग्ने सम्भावना कायमै राखेको छ । ९ खेलमा ४ वटा जित र ५ हारपछि ८ अंक जोडेको काठमाडौं नाइट्स तेस्रो स्थानमा छ ।
By
By
By
