काठमाडौं, ३० कात्तिक
हाल परराष्ट्र मन्त्री रहेका नेपाली कांग्रेसका नेता डा. नारायण खड्का यसपटक उदयपुर-१ बाट चौथो पटक प्रतिनिधिसभामा पुग्ने प्रयासमा छन् । उनलाई रोक्न नेकपा (एमाले)की नेतृ मञ्जुकुमारी चौधरी मैदानमा छिन् ।पूर्वशहरी विकास राज्यमन्त्री चौधरी डा. खड्काको पुरानै प्रतिस्पर्धी हुन् । २०७४ को निर्वाचनमा वाम गठबन्धनको साथ पाएकी चौधरीलाई पराजित गरेका खड्का यसपटक सत्ता गठबन्धनका साझा उम्मेदवार छन् ।
भोजपुरमा जन्मिएका ६३ वर्षीय डा. खड्का हाल उदयपुरको त्रियुगा नगरपालिका–८ का स्थायी बासिन्दा हुन् । २०५६ सालको आमनिर्वाचनमा उदयपुर–१ मा एमालेका उम्मेदवारसँग पराजित भएका खड्का त्यसयता २०६४, २०७० र २०७४ सालमा निरन्तर विजयी भए ।
२०५६ सालमा प्रधानमन्त्री कृष्णप्रसाद भट्टराई (किसुनजी)का आर्थिक सल्लाहकार रहेका उनी २०५७ सालमा राष्ट्रिय योजना आयोगको उपाध्यक्ष नियुक्त भए । उनले भारतको पुने विश्वविद्यालयबाट अर्थशास्त्रमा विद्यावारिधि गरेका छन् ।
२०५९ मा किसुनजीको समर्थनमा शेरबहादुर देउवाले नेपाली कांग्रेस विभाजन गरेर प्रजातान्त्रिक कांग्रेस गठन गर्दा डा. खड्का देउवातिर लागे । त्यसको पाँच वर्षपछि कांग्रेस एकीकृत भएपछिको १२औं महाधिवेशनबाट उनी पहिलोपटक केन्द्रीय सदस्य चुनिए ।
सुरुदेखि नै किसुनजीको समूहमा रहेका डा. खड्का केन्द्रीय सदस्य भएपछि सुशील कोइरालासँग नजिक भए । २०७० मा कोइरालाको क्याबिनेटमा उनले शहरी विकास मन्त्रीको जिम्मेवारी पाए । २०७२ सालमा भएको कांग्रेसको १३औं महाधिवेशनबाट उनी पुनः केन्द्रीय सदस्यमा निर्वाचित भए ।
एमालेको पकड क्षेत्रको रूपमा रहेको उदयपुर–१ मा कांग्रेसका डा. खड्काले २०६४ र २०७० का दुवै संविधानसभा निर्वाचन जिते । संविधानसभाबाट नयाँ संविधान जारी भएपछि २०७४ को प्रतिनिधिसभासम्मको निर्वाचनमा पनि बाजी मारे ।
२०७० सालसम्म उदयपुरमा ३ निर्वाचन क्षेत्र थियो । २०७० को संविधानसभा निर्वाचनमा डा. खड्का साविक उदयपुर–१ र मञ्जुकुमारी चौधरी उदयपुर–२ बाट विजयी भएका थिए । दुई मात्र निर्वाचन क्षेत्र भएपछि २०७४ मा खड्काले एमालेकी चौधरीलाई उदयपुर–१ मा पराजित गरे ।
त्यसबेला खड्काले वाम गठबन्धनकी उम्मेदवार चौधरीलाई ५४८ मतान्तरले पराजित गरेका थिए । खड्काले ३३ हजार १४२ र चौधरीले ३२ हजार ५९४ मत पाएकी थिइन् । त्यसबेला चौधरीलाई सघाएको माओवादी केन्द्र यो पटक खड्कालाई जिताउन लागिपरेको छ ।
स्थानीय चुनावमा वडाअध्यक्षका उम्मेदवारहरूले पाएको दलगत मतको आधारमा पनि उदयपुर–१ मा सत्ता गठबन्धन बलियो छ । पाँचदलीय गठबन्धनसँग कुल ४२ हजार २७३ र एमालेसँग २७ हजार ७९७ मत छ । पछिल्लो स्थानीय चुनावको यो अंकगणित डा. खड्काका लागि अनुकूल देखिन्छ । तर निर्वाचन हो, हार वा जित यसैको हुन्छ भन्न सकिन्न ।
By
By
