काठमाडौं । पुष ८ गते
सरकारले छिट्टै कोरोनाविरुद्धको बुस्टर डोज दिने तयारी गरेको छ। स्वास्थ्य तथा जनसंख्या मन्त्री विरोध खतिवडाले विश्व स्वास्थ्य संगठन (डब्लुएचओ)ले अनुमति दिए पुस अन्तिमदेखि बुस्टर डोज दिन सुरू गरिने जानकारी दिनु भएको छ ।
मन्त्री खतिवडाले मन्त्रालयको नियमित प्रेस ब्रिफिङमा अनुमति पाएको खण्डमा छिट्टै बुस्टर डोज दिन सरकार तयारी अवस्थामा रहेको जनाउनु भएको छ । उहाँले बुस्टर डोज सुरू गर्दा पहिलो चरणमा फ्रन्टलाइनमा खटिने स्वास्थ्यकर्मी, सुरक्षाकर्मीलाई लगाइने र विस्तारै वृद्धवृद्धा, बालबालिका हुँदै सबै नागरिकलाई लगाइने बताउनु भएको छ ।
पछिल्लो पटक ओमिक्रोनको संक्रमण बढ्दै गएको भन्दै सरकारले सजगताका साथ पूर्वतयारी गरिरहेको खतिवडाको भनाई छ । सरकारले १८ वर्ष र माथि उमेर समूहका लागि कोभिशिल्ड र भेरोसेल खोप र १८ वर्ष मुनिका उमेर समूह १२–१७ का लागि फाइजर र मोडर्ना खोप लगाउँदै आएको छ। उहाँले सरकारको प्राथमिकतामा रहेको कोरोना विरुद्धको खोप अभियानलाई सफल पार्न आग्रह गर्नु भएको छ ।
By
By
