भोटेकोशी, सिन्धुपाल्चोक ।
राष्ट्रिय युवा संघ नेपाल, भोटेकोशी गाउँपालिका कमिटीको आयोजनामा वृक्षारोपण कार्यक्रम तथा संगठन सुदृढीकरणसम्बन्धी पहिलो बैठक आज उत्साहपूर्ण वातावरणमा सम्पन्न भएको छ।
कार्यक्रम दिनेश न्यौपाने, उर्गेन लामा र साङ्गे शेर्पाको नेतृत्वमा सम्पन्न भएको हो। कार्यक्रममा भोटेकोशीका स्थानीय युवाहरूको उल्लेखनीय सहभागिता रहँदा वातावरण संरक्षणसँगै युवा सशक्तीकरण र संगठन विस्तारमा समेत सकारात्मक सन्देश गएको आयोजकले जनाएको छ।
उक्त कार्यक्रममा प्रमुख अतिथि राष्ट्रिय युवा संघ नेपालका पूर्व केन्द्रीय सदस्य तथा नेकपा (एमाले) सिन्धुपाल्चोक जिल्ला सदस्य छिरिङ शेर्पा रहनुभएको थियो। विशेष अतिथिका रूपमा युवा संघका जिल्ला अध्यक्ष सुरज लामा, पालिकास्तरीय पदाधिकारीहरू, तथा अनेरास्ववियु सिन्धुपाल्चोकका विभागीय प्रमुख निशान परियारको समेत उपस्थिति थियो।
कार्यक्रमलाई सम्बोधन गर्दै अनेरास्ववियुका विभागीय प्रमुख निशान परियारले भने, “विकास सहरको कुर्सीमा बसेर सम्भव छैन। साँचो परिवर्तन गाउँबाटै सुरू हुन्छ, जहाँ समस्या प्रत्यक्ष देखिन्छ। अब माथिबाट आदेशको पर्खाइ नगरी युवाहरूले तल्लो तहमै सक्रिय हुनुपर्छ।”
त्यसैगरी, युवा नेता दिनेश न्यौपानेले युवाहरूको एकताको महत्वमा जोड दिंदै भन्नुभयो, “गाउँ–समाजको विकासको आधारशिला युवाहरू हुन्। जब युवाहरू एकजुट भएर अघि बढ्छन्, तब समाज र देश परिवर्तन सम्भव हुन्छ।”
जिल्ला अध्यक्ष सुरज लामाले यस्ता कार्यक्रमहरू संगठन सुदृढीकरणका लागि आवश्यक रहेको बताउँदै भन्नुभयो, “वृक्षारोपणजस्ता अभियानहरू निरन्तर सञ्चालन गर्नुपर्छ। संगठनको प्रभाव गाउँमै देखिनुपर्छ, आदेशको प्रतीक्षा गरेर मात्र परिवर्तन सम्भव हुँदैन।”
उहाँले सम्पूर्ण पालिका कमिटीहरूलाई grassroots स्तरमा काम गर्दै जनसरोकारका अभियानलाई निरन्तरता दिन आह्वान गर्नुभयो।
कार्यक्रममा अन्य पालिकाका युवा नेताहरूको समेत उपस्थिति रहेको थियो भने वृक्षारोपण अभियान सफलतापूर्वक सम्पन्न गरिएको आयोजकले जानकारी दिएको छ।
By
By
