वीरगंज – विशेष सूचनाका आधारमा प्रहरीले वीरगञ्ज महानगरपालिका–२ घुसुकपुर इदगाह चोक सडकखण्डबाट श्रोत नखुलेको करिब १४ लाख १३ हजार ५०० रुपैयाँ हुण्डी रकमसहित दुई जनालाई पक्राउ गरेको छ। भदौ ५ गते साँझ करिब ४:२० बजे भारतीय नम्बर प्लेटको मोटरसाइकल (BR05 AB 7761) र प्रदेश २–०३–००२ प ५५४४ नम्बरको मोटरसाइकल रोकी खानतलासी गर्दा उनीहरूलाई नियन्त्रणमा लिइएको हो।
पक्राउ पर्नेमा पर्सा घुसुकपुरका ३९ वर्षीय संजय कुमार साह र बारा महागढीमाई–४ का ४१ वर्षीय शनि कुमार ठाकुर रहेका छन्। उनीहरूले प्रयोग गरेको मोटरसाइकलमा फल्स सिलिङ बनाइ लुकाइ राखिएको अवस्थामा १० लाख रुपैयाँ १००० दरका नोट र ४ लाख १३ हजार ५०० रुपैयाँ ५०० दरका नोट फेला परेको प्रहरीले जनाएको छ। जिल्ला प्रहरी कार्यालय पर्साका प्रहरी उपरीक्षक (एसपी) गौतम मिश्राका अनुसार उनीहरूलाई मुलुकी अपराध संहिता २०७४ को दफा १२५(क) अनुसार हुण्डी कारोबारसम्बन्धी कसूरमा मुद्दा दर्ता गरी जिल्ला अदालत पर्साबाट पाँच दिनको म्याद लिई थप अनुसन्धान भइरहेको छ।
By
By
