अन्तराष्ट्रिय खबर - You TV Nepal

Lions District 325P Nepal को Cabinet Schooling Program ले दियो नयाँ नेतृत्वको सन्देश

anjana soni — Mon, 18 May 2026 15:57:49 +0000

धुलिखेलस्थित होटल सारथीमा Lions International District 325P Nepal द्वारा आयोजित Cabinet Schooling Program भव्य तथा सफलतापूर्वक सम्पन्न भएको छ। कार्यक्रममा आगामी District Governor Lion Sandeep Kausadan सहित विभिन्न लायन नेतृत्वहरुको उल्लेखनीय सहभागिता रहेको थियो।

नेतृत्व विकास, संगठनात्मक क्षमता अभिवृद्धि, अनुभव आदानप्रदान तथा सेवाभावलाई अझ प्रभावकारी बनाउने उद्देश्यले आयोजना गरिएको उक्त कार्यक्रम अत्यन्त प्रेरणादायी र उपलब्धिमूलक बनेको सहभागीहरुले बताएका छन्।

कार्यक्रममा लायन सदस्यहरुलाई नेतृत्व, अनुशासन, सामाजिक सेवा तथा आगामी योजनाबारे विशेष प्रशिक्षण प्रदान गरिएको थियो। साथै विभिन्न सम्मान कार्यक्रम र विशेष क्षणहरुले कार्यक्रमलाई थप आकर्षक बनाएको थियो।

कार्यक्रम सफल बनाउन सहयोग गर्नुहुने सम्पूर्ण आयोजक, लायन नेतृत्व तथा सहभागी महानुभावहरूप्रति हार्दिक धन्यवाद व्यक्त गरिएको छ।

The post Lions District 325P Nepal को Cabinet Schooling Program ले दियो नयाँ नेतृत्वको सन्देश first appeared on You TV Nepal.

लायन्स ३२५ पीको नेतृत्व कसौधनलाई, मीना पन्थी र अर्चित श्रेष्ठ पनि निर्वाचित

anjana soni — Mon, 13 Apr 2026 15:24:26 +0000

लायन्स क्लब इन्टरनेशनल डिष्ट्रिक ३२५ पीको गभर्नरमा सन्दीप कसौधन सर्वसम्मत निर्वाचित हुनुभएको छ। बुटवलमा शनिवार सम्पन्न निर्वाचनबाट उहाँ आगामी वर्ष २०२६/०२७ का लागि गभर्नर चयन हुनुभएको हो।
उक्त निर्वाचनबाट फस्ट भाइस डिष्ट्रिक गभर्नर (भिडिजी) मा मीना पन्थी तथा सेकेन्ड भिडिजीमा अर्चित श्रेष्ठ निर्वाचित हुनुभएको छ। त्यसैगरी डिष्ट्रिक सचिवमा आशिष कृष्ण श्रेष्ठ र कोषाध्यक्षमा सुरेन्द्र घिमिरे चयन हुनुभएको छ।
लायन्स क्लब इन्टरनेशनल डिष्ट्रिक ३२५ पीको चौथो कन्वेसन अन्तर्गत आयोजित कार्यक्रममा नवनिर्वाचित गभर्नर कसौधनले सम्पूर्ण लायन्स सदस्यहरुलाई एकजुट भई मानवीय सेवामा निस्वार्थ रुपमा समर्पित रहन आग्रह गर्नुभयो। उहाँले संगठनको लक्ष्य प्राप्तिका लागि सबैलाई दृढतापूर्वक लाग्न पनि आह्वान गर्नुभयो।
कार्यक्रममा विभिन्न पदाधिकारी तथा सदस्यहरुको उल्लेखनीय सहभागिता रहेको थियो।

The post लायन्स ३२५ पीको नेतृत्व कसौधनलाई, मीना पन्थी र अर्चित श्रेष्ठ पनि निर्वाचित first appeared on You TV Nepal.

श्री करौली शंकर महादेव महाराज ‘श्री पञ्चायती अखाडा नयाँ उदासीन निर्वाण’ को महामण्डलेश्वर नियुक्त

anjana soni — Thu, 02 Apr 2026 09:24:07 +0000

पर्सा-

श्री करौली शंकर महादेव धाम, मिश्री मठका सर्वोच्च प्रमुख श्री करौली शंकर महादेव महाराज ‘श्री पञ्चायती अखाडा नयाँ उदासीन निर्वाण’ को महामण्डलेश्वर नियुक्त हुनुभएको छ। हरिद्वारमा आयोजित एक भव्य पट्टाभिषेक समारोहका बीच विभिन्न अखाडाका सन्त-महन्त र विशिष्ट महानुभावहरूको उपस्थितिमा उहाँको तिलक-चादर र पट्टाभिषेक विधि सम्पन्न भएको हो।

भारतीय संस्कृतिका संवाहक: महन्त भगतरामजी

समारोहलाई सम्बोधन गर्दै अखाडाका मुख्य मुखिया महन्त भगतरामजी महाराजले करौली शंकर महादेव योग, मन्त्र दीक्षा, ध्यान र भारतीय संस्कृतिका सच्चा संवाहक भएको बताउनुभयो। “सन्तहरूको जीवन परोपकारमा समर्पित हुन्छ,” उहाँले भन्नुभयो, “करौली शंकर महादेवले विश्वभरका मानव जातिलाई दुःखबाट मुक्त गराउन गरिरहनुभएको कार्य प्रशंसनीय छ।”

अन्धविश्वास विरुद्ध अध्यात्म विज्ञान

अखाडाका सचिव महन्त जगतार मुनिजीले करौली शंकर महादेवको सबैभन्दा ठूलो योगदान शिव तन्त्रको ज्ञानलाई अन्धविश्वासबाट मुक्त गराई ‘स्मृतिमा आधारित अध्यात्म विज्ञान’ को रूपमा स्थापित गर्नु रहेको बताउनुभयो। उहाँले आफ्ना गुरु पण्डित श्री राधा रमणजी मिश्रको परम्परालाई वैज्ञानिक ढङ्गले अगाडि बढाएको भन्दै प्रशंसा गर्नुभयो।

मानवताको सेवामा समर्पित

अखिल भारतीय अखाडा परिषद्का राष्ट्रिय अध्यक्ष श्री महन्त रविन्द्र पुरीजी महाराजले करौली शंकर महादेवलाई मानवताको सेवा गर्ने अनुपम सन्तको रूपमा चित्रण गर्दै नयाँ जिम्मेवारीका लागि शुभकामना दिनुभयो। त्यस्तै, श्री पञ्चायती निर्मल अखाडाका महन्त ज्ञानदेव सिंहजीले यस नियुक्तिले सन्त समुदायमा नयाँ ऊर्जा थपेको विचार व्यक्त गर्नुभयो।

आगामी कुम्भ मेलाको तयारी

पट्टाभिषेकपछि बोल्दै नवनियुक्त महामण्डलेश्वर करौली शंकर महादेवले आफ्ना गुरु पनि यसै अखाडासँग आबद्ध रहेकाले आफूले यसलाई सेवाको क्षेत्र रोजेको बताउनुभयो। उहाँले हरिद्वारमा आयोजना हुने आगामी कुम्भ मेलालाई भव्य र दिव्य बनाउन अखाडाले सुम्पिने हरेक जिम्मेवारी पूर्ण निष्ठाका साथ पुरा गर्ने प्रतिबद्धता समेत जनाउनुभयो।

विशिष्ट उपस्थिति

महामण्डलेश्वर स्वामी हरिचेतानन्दजी महाराजले सञ्चालन गरेको उक्त समारोहमा क्याबिनेट मन्त्री प्रदीप बत्रा, विधायक आदेश चौहान, पूर्व मेयर मनोज गर्ग, विभिन्न अखाडाका कोठारी तथा देशभरका सयौँ सन्त र भक्तजनहरूको सहभागिता रहेको थियो।

The post श्री करौली शंकर महादेव महाराज ‘श्री पञ्चायती अखाडा नयाँ उदासीन निर्वाण’ को महामण्डलेश्वर नियुक्त first appeared on You TV Nepal.

२०७९ को तुलनामा २०८२ को निर्वाचन शान्तिपूर्ण, सुरक्षा व्यवस्थापनमा नेपाल प्रहरी को उल्लेखनीय भूमिका

YOUTV Nepal — Sun, 08 Mar 2026 07:31:11 +0000

काठमाडौं । २०७९ सालको निर्वाचनको तुलनामा २०८२ सालको निर्वाचन वातावरण यसपटक धेरै शान्तिपूर्ण देखिएको छ। देशभर मतदानका क्रममा कुनै ठूलो अप्रिय घटना नघट्नुले सुरक्षा व्यवस्थापन प्रभावकारी भएको देखिएको छ।
निर्वाचन अवधिभर शान्ति र सुरक्षालाई प्राथमिकता दिँदै नेपाल प्रहरी ले विशेष सुरक्षा योजना लागू गरेको थियो। मतदान केन्द्रदेखि मतगणना स्थलसम्म कडा निगरानी राखिएको कारण सर्वसाधारण मतदाताले ढुक्कसँग आफ्नो मताधिकार प्रयोग गर्न सकेका छन्।
सुरक्षा निकायको सक्रिय उपस्थितिका कारण सम्भावित विवाद र अवाञ्छित गतिविधि धेरै हदसम्म नियन्त्रणमा आएको सुरक्षा अधिकारीहरूले बताएका छन्। २०७९ को निर्वाचनमा देखिएका केही तनावपूर्ण अवस्थाको तुलनामा यसपटक वातावरण निकै सहज र व्यवस्थित बनेको जनाइएको छ।
यसैबीच, मतदाताहरूले पनि संयमता अपनाउँदै शान्तिपूर्ण रूपमा मतदान प्रक्रियामा सहभागिता जनाएका छन्। समग्रमा २०८२ को निर्वाचनलाई शान्तिपूर्ण र व्यवस्थित रूपमा सम्पन्न गराउन सुरक्षा निकायको भूमिका महत्वपूर्ण रहेको बताइएको छ।

The post २०७९ को तुलनामा २०८२ को निर्वाचन शान्तिपूर्ण, सुरक्षा व्यवस्थापनमा नेपाल प्रहरी को उल्लेखनीय भूमिका first appeared on You TV Nepal.

ललितपुर–१६ मा निःशुल्क स्वास्थ्य शिविर र रक्तदान कार्यक्रम हुने

YOUTV Nepal — Mon, 29 Dec 2025 10:43:39 +0000

ललितपुर महानगरपालिका वडा नम्बर १६ मा निःशुल्क स्वास्थ्य शिविर तथा रक्तदान कार्यक्रम आयोजना हुने भएको छ।
लायन्स क्लब अफ काठमाडौं एक्सिलेन्स टिम एरिया–१ का जोन चेयरपर्सन उद्धव गुप्ता, अध्यक्ष, उपाध्यक्ष, सचिव केम्स सिंह र श्रीजा श्रेष्ठको सहमतिमा कार्यक्रम गर्न लागिएको हो। यही कार्यक्रमका लागि आज सोमबार वडा अध्यक्ष निर्मल रत्न शाक्यलाई ज्ञापनपत्र बुझाइएको छ।
ज्ञापनपत्रमार्फत वडा नम्बर १६, ललितपुरमा स्वास्थ्य शिविर र रक्तदान कार्यक्रम सञ्चालन गर्न अनुमति तथा सहकार्यको आग्रह गरिएको हो। कार्यक्रममा लायन्स क्लब काठमाडौं एरिया–१, ३२५ पी, रह स्टार होलिस्टिक हिलिङ तथा सम्बन्धित वडाका सबै निकायको सहकार्य रहने जनाइएको छ।
आयोजकका अनुसार कार्यक्रम पूर्ण रूपमा निःशुल्क हुनेछ। यसबाट वडावासीले स्वास्थ्य जाँच, परामर्श र रक्तदानजस्ता सेवाबाट प्रत्यक्ष लाभ लिन सक्ने विश्वास गरिएको छ।
वडा अध्यक्ष शाक्यले यस्ता सामाजिक र स्वास्थ्यसम्बन्धी कार्यक्रमले समुदायलाई सकारात्मक प्रभाव पार्ने भन्दै आवश्यक सहकार्य रहने संकेत गर्नुभएको छ। कार्यक्रमको मिति र अन्य विवरण छिट्टै सार्वजनिक गरिने आयोजकले जनाएको

The post ललितपुर–१६ मा निःशुल्क स्वास्थ्य शिविर र रक्तदान कार्यक्रम हुने first appeared on You TV Nepal.

द ब्रिटिश कलेजको स्पष्टिकरण: सामाजिक सञ्जालमा फैलाइएका आरोप भ्रामक, कलेजको शैक्षिक गतिविधि नियमित

YOUTV Nepal — Tue, 23 Dec 2025 17:29:40 +0000

काठमाडौं । द ब्रिटिश कलेजले कलेजविरुद्ध सामाजिक सञ्जाल तथा केही आम सञ्चार माध्यममार्फत फैलाइएका भ्रामक सूचना र आरोपहरूबारे तथ्य सार्वजनिक गर्दै प्रेस विज्ञप्ति जारी गरेको छ।
कलेजका अनुसार द ब्रिटिश कलेज नेपालका सम्बन्धित नियामक निकायको स्वीकृतिमा सञ्चालन भइरहेको प्रतिष्ठित उच्च शैक्षिक संस्था हो। कलेजले अन्तर्राष्ट्रिय रूपमा मान्यता प्राप्त विश्वविद्यालयहरूसँग औपचारिक सहकार्यमा विभिन्न शैक्षिक कार्यक्रम सञ्चालन गर्दै आएको स्पष्ट गरिएको छ।
कलेजले दुबईस्थित द वुलविच इन्स्टिच्युटलाई त्यहाँको कानुनअनुसार सञ्चालनमा रहेको स्वतन्त्र शैक्षिक संस्था भएको उल्लेख गरेको छ। हाल उक्त संस्थामा २५ भन्दा बढी देशका ३०० भन्दा बढी विद्यार्थी अध्ययनरत रहेको जनाइएको छ।
Hospitality Management Foundation कार्यक्रम अन्तर्राष्ट्रिय रूपमा मान्यता प्राप्त भएको र यसअन्तर्गत अध्ययनरत विद्यार्थीहरूलाई दुबईमा Higher National Diploma (HND) अध्ययन गर्ने अवसर प्रदान गरिएको कलेजको भनाइ छ। HND सफलतापूर्वक पूरा गरेपछि विद्यार्थीहरूले आवश्यक मापदण्ड पूरा गरी दुबई, बेलायत वा अष्ट्रेलियाका साझेदार संस्थामा Top-Up Bachelor’s Degree अध्ययन गर्न सक्ने व्यवस्था रहेको कलेजले जनाएको छ।
इन्टर्नशिपका विषयमा कलेजले स्पष्ट रूपमा ग्यारेन्टी नदिइने जानकारी भर्ना अगावै विद्यार्थीहरूलाई दिइने गरेको जनाएको छ। दुबई जाने विद्यार्थीहरूका लागि प्रारम्भिक अस्थायी आवासको व्यवस्था तेस्रो पक्ष सेवा प्रदायकमार्फत गरिएको र दीर्घकालीन आवास विद्यार्थीले आफैं व्यवस्थापन गर्नुपर्ने अन्तर्राष्ट्रिय अभ्यासअनुसार रहेको स्पष्ट गरिएको छ।
कलेजका अनुसार Hospitality Management अध्ययनरत करिब ५१ विद्यार्थीमध्ये ९ जना व्यक्तिगत असन्तुष्टिका कारण नेपाल फर्किएका थिए। ती विद्यार्थीहरू नेपाल फर्किएपछि कलेजले अभिभावक तथा विद्यार्थीहरूसँग औपचारिक छलफल गरी समाधानको प्रयास गरेको र छलफल सकारात्मक ढंगले अघि बढिरहेको अवस्थामा सामाजिक सञ्जालमार्फत भ्रामक सामग्री फैलाइएको उल्लेख गरिएको छ।
कलेजले केही बाह्य व्यक्तिहरूले विद्यार्थीको नाम प्रयोग गरी अनधिकृत भिडियो, पर्चा तथा उक्साहटपूर्ण गतिविधि गरेको आरोप लगाएको छ। यस क्रममा कलेजको शैक्षिक वातावरण अवरुद्ध गर्ने, कर्मचारीमाथि दुर्व्यवहार गर्ने तथा कार्यालयमा तोडफोडसमेत भएको कलेजको भनाइ छ। शैक्षिक वातावरण सुरक्षित राख्न सुरक्षानिकायको सहयोग लिनुपरेको पनि कलेजले जनाएको छ।
द ब्रिटिश कलेजले आफूमाथि लगाइएका शोषण तथा मानव तस्करीसम्बन्धी सबै आरोपहरू पूर्ण रूपमा अस्वीकार गर्दै ती आरोपहरू असत्य, आधारहीन र मानहानीपूर्ण भएको स्पष्ट गरेको छ।
कलेजले विद्यार्थीको सुरक्षा, मर्यादा र दीर्घकालीन हितलाई प्राथमिकतामा राख्दै सबै शैक्षिक कार्यक्रमहरू नियमित रूपमा सञ्चालन भइरहेको जानकारी गराएको छ। पठनपाठन, मूल्याङ्कन तथा परीक्षा तोकिएको शैक्षिक क्यालेन्डरअनुसार नै सञ्चालन हुने कलेजको भनाइ छ।
अन्त्यमा, कलेजले विद्यार्थी, अभिभावक तथा सरोकारवालाहरूलाई अपुष्ट र भ्रामक सूचनामा विश्वास नगर्न आग्रह गर्दै खुला, पारदर्शी र जिम्मेवार संवादमार्फत समस्या समाधान गर्न सदैव तयार रहेको स्पष्ट गरेको छ।

The post द ब्रिटिश कलेजको स्पष्टिकरण: सामाजिक सञ्जालमा फैलाइएका आरोप भ्रामक, कलेजको शैक्षिक गतिविधि नियमित first appeared on You TV Nepal.

लायन्स डिस्ट्रिक्ट ३२५ पी एरिया–१ द्वारा “मिसन १.५ ट्रेनिङ” भव्य रूपमा सम्पन्न

YOUTV Nepal — Sun, 14 Dec 2025 03:06:29 +0000

लायन्स क्लब इन्टरनेशनल डिस्ट्रिक्ट ३२५ पी, एरिया–१ द्वारा आयोजना गरिएको “मिसन १.५ ट्रेनिङ” कार्यक्रम सफलतापूर्वक सम्पन्न भएको छ। कार्यक्रममा लायन्स क्लबका सदस्यहरू, गैर–लायन्स अतिथि तथा विभिन्न क्षेत्रका सहभागीहरूको उत्साहजनक उपस्थितिले कार्यक्रमलाई अझ प्रभावकारी र अर्थपूर्ण बनाएको आयोजकले जनाएको छ।

कार्यक्रमका प्रमुख स्रोत व्यक्ति तथा जीएमटी को–कोर्डिनेटर बिनोद खरेल ले आफ्नो अनुभव र ज्ञान साझा गर्दै सहभागीहरूलाई प्रेरणा प्रदान गर्नुभएको थियो। उहाँको मार्गदर्शनले प्रशिक्षणलाई थप उपयोगी बनाएको सहभागीहरूको भनाइ छ।

कार्यक्रम आयोजना गर्न द ब्रिटिस कलेज मा स्थान व्यवस्थापन गरिदिनु भएकोमा जोन चेयर सरोज महतो र उधब (यू.डी.) गुप्ता प्रति आयोजकले विशेष धन्यवाद व्यक्त गरेको छ। साथै द ब्रिटिस कलेज, काठमाडौंका मार्केटिङ को हेड अमरदीप मण्डल ले दिएको आतिथ्य र सहयोगप्रति पनि कृतज्ञता व्यक्त गरिएको छ।

कार्यक्रमको प्रचार–प्रसार तथा सञ्चारमा सक्रिय भूमिका निर्वाह गर्नु भएकी बिमा महर्जन को योगदान उल्लेखनीय रहेको छ। त्यस्तै, क्षेत्रीय संयोजक विदुर बराल र एरिया कोषाध्यक्ष बिना महर्जन ले व्यवस्थापन पक्षलाई सहज बनाएको आयोजकले जनाएको छ।

कार्यक्रम सफल बनाउन सहयोग पुर्‍याउनु भएका जोन चेयर राजन कुवर, अर्को जोन चेयर तथा एलसिआइएफ को–कोर्डिनेटर, सचिवालय प्रमुख दिनेश बुढाथोकी, प्राविधिक सहयोगी प्रज्वल जोशी, फोटोग्राफर लियो रुजेश महर्जन, लियो एरिया–४ प्रमुख संयोजक नाबराज भण्डारी लगायत सबैलाई आयोजकले धन्यवाद दिएको छ।

कार्यक्रममा मनोवैज्ञानिक पेमा चोडेन को विशेष उपस्थिति र एनआइएमबीकी लायन पल्लवी गुरुङ ले स्रोत व्यक्तिको रूपमा दिएको योगदानलाई पनि प्रशंसा गरिएको छ। साथै डिस्ट्रिक्ट को–चिफ एडभाइजर बाबुराम निरौला र सोनाली गुरुङ को निरन्तर मार्गदर्शनप्रति आभार व्यक्त गरिएको छ।

कार्यक्रमको नेतृत्व सगुन धाख्वा एरिया प्रमुख र निरन्तर सहयोगका लागि डिस्ट्रिक्ट गभर्नर बलराम भट्टराई प्रति आयोजकले कृतज्ञता जनाएको छ। अन्त्यमा, मार्गदर्शक तथा अभिभावकको रूपमा साथ दिँदै आउनु भएका पीडीजी अनूप पहाडी र अर्का पीडीजी प्रति विशेष सम्मान र धन्यवाद व्यक्त गरिएको छ।

आयोजकका अनुसार यस्ता प्रशिक्षण कार्यक्रमहरूले लायन्स अभियानलाई अझ मजबुत बनाउँदै समाजसेवाको यात्रालाई अगाडि बढाउने विश्वास लिइएको छ।

The post लायन्स डिस्ट्रिक्ट ३२५ पी एरिया–१ द्वारा “मिसन १.५ ट्रेनिङ” भव्य रूपमा सम्पन्न first appeared on You TV Nepal.

जेन–जी आन्दोलनको क्षति विवरण सार्वजनिक: सरकारी र निजी क्षेत्रमा साढे ७८ अर्बको भौतिक क्षति

anjana soni — Mon, 17 Nov 2025 08:22:08 +0000

काठमाडौं – देशभर भएको ‘जेन–जी आन्दोलन’ का क्रममा तोडफोड, आगजनी र लुटपाटका घटनाबाट सरकारी तथा निजी क्षेत्रमा गरी करिब ७८ अर्ब ५१ करोड रुपियाँ बराबरको भौतिक क्षति भएको सरकारी मूल्याङ्कन सार्वजनिक भएको छ।

यसअघि निजी क्षेत्रबाट मात्रै ८० अर्ब रुपियाँभन्दा बढी क्षति भएको प्रारम्भिक अनुमान गरिएको थियो।

क्षतिको विस्तृत विवरण (Detailed Damage Report)

अर्थमन्त्री रामेश्वर खनालले आइतबार नेपाल चेम्बर अफ कमर्सद्वारा आयोजित कार्यक्रममा क्षतिको विवरण सार्वजनिक गर्नुभएको हो।

विवरण	संख्या / रकम
समग्र क्षतिको सरकारी मूल्याङ्कन	७८ अर्ब ५१ करोड रुपियाँ
क्षति पुगेका कुल इकाई	५५ जिल्लाका १,९५७ इकाई
निजी क्षेत्रका इकाई	४१९ इकाई
निजी क्षेत्रको क्षति मूल्याङ्कन	करिब ३६ अर्ब रुपियाँ
निजी क्षेत्रको बीमा दाबी	२३ अर्ब रुपियाँभन्दा बढी
सरकारी/सार्वजनिक इकाई	करिब १,५३८ इकाई (संघीय, प्रादेशिक, स्थानीय)
सार्वजनिक सम्पत्तिमा क्षति भएका स्थानीय तह	५१४ स्थानीय तह

मन्त्री खनालले सरकारले सुरुमा करिब २ सय अर्ब रुपियाँ बराबरको क्षति हुन सक्ने अनुमान गरेको भए पनि, विस्तृत मूल्याङ्कनपछि वास्तविक क्षति अनुमानभन्दा कम देखिएको बताउनुभयो।

अर्थमन्त्रीको भनाइ र चेम्बरको माग

अर्थमन्त्रीको धारणा: अर्थमन्त्री खनालले अर्थतन्त्र सुदृढीकरण, रोजगारी सिर्जना र युवालाई नेपालमै व्यवसायतर्फ अभिमुखीकरणलगायत निजी क्षेत्रले राखेका सुझावलाई सरकारले सकारात्मक रूपमा लिएको बताउनुभयो। तर, उहाँले कानुनी आधार (ऐन) नहुँदासम्म केही सुधारात्मक कदमहरू तुरुन्त लागू गर्न नसकिने स्पष्ट पार्नुभयो।
चेम्बरको सुझाव: कार्यक्रममा नेपाल चेम्बर अफ कमर्सका अध्यक्ष कमलेश अग्रवालले आर्थिक गतिविधि सुचारु गराउन सरकारलाई विभिन्न सुझावहरू प्रस्तुत गर्नुभयो। उहाँका मुख्य मागहरूमा:
- कर प्रशासनमा एकद्वार प्रणाली र प्रविधिमैत्री कर प्रणाली लागू गर्ने।
- सबै कारोबारलाई एउटै प्रकृतिमा तुलना नगर्ने।
- राष्ट्र बैंकले जारी गरेको चालु पुँजी कर्जा निर्देशिका खारेज गर्ने।
- घरजग्गा व्यवसाय पुनर्जीवन गर्ने र लगानी प्रवद्र्धन नीति ल्याउने।
- सरकार र व्यवसायीबीच विश्वासको वातावरण निर्माण गर्ने।

आन्दोलनले पारेको गहिरो आर्थिक घाटासँग जुध्न सरकार र निजी क्षेत्रले सहकार्य गर्नुपर्ने आवश्यकता देखिएको छ।

The post जेन–जी आन्दोलनको क्षति विवरण सार्वजनिक: सरकारी र निजी क्षेत्रमा साढे ७८ अर्बको भौतिक क्षति first appeared on You TV Nepal.

भारत–नेपाल रेल व्यापर सञ्जाल विस्तार : रेलमार्फत व्यापार सहज बनाउने पत्र आदान–प्रदान

anjana soni — Fri, 14 Nov 2025 05:55:43 +0000

नेपाल र भारतले रेलमार्फत व्यापारिक आवागमन सहज र विस्तार हुने गरी बिहीबार एक महत्वपूर्ण पत्र (Letter of Exchange) आदान–प्रदान गरेका छन्। यो पत्रले दुवै देशबीचको ट्रान्जिट सन्धिको प्रोटोकल संशोधन गर्ने कार्य औपचारिक रूपमा सम्पन्न भएको छ।

नेपालका उद्योग, वाणिज्य तथा आपूर्ति मन्त्री अनिलकुमार सिन्हाको नयाँ दिल्ली भ्रमणका क्रममा भारतीय वाणिज्य तथा उद्योगमन्त्री पीयूष गोयलसँग भएको बैठकपछि सो पत्रमा हस्ताक्षर गरिएको हो। कार्यक्रममा मन्त्रीद्वयको उपस्थितिमा दुवै पक्षका अधिकारीहरूले कागजात आदान–प्रदान गरेका थिए।

भारतको वाणिज्य मन्त्रालयद्वारा जारी विज्ञप्तिअनुसार, नयाँ संशोधनले जोगबनी (भारत)–विराटनगर (नेपाल) रेलमार्ग हुँदै कन्टेनर तथा बल्क दुवै प्रकारका मालसामानको आवत–जावत सहज गर्नेछ। यसअघि चार प्रकारका वस्तु (कोइला, क्लिङ्कर, सिमेन्ट र मल) मात्र तेस्रो देशबाट रेलमार्फत ल्याउन पाइन्थ्यो।

अब बिराटनगर र नौतनवाबाट पनि रेलमार्फत माल ढुवानी

यसअघि रेलभित्र्याउने एक मात्र नाका बिर्गञ्ज समेकित जाँच चौकी (ICP) थियो। नयाँ संशोधनपछि बिराटनगर ICP र नौतनवा–सुनौली हुँदै पनि सबै प्रकारका रेल कार्गो आवत–जावत गर्न मिल्नेछ। यसले बिर्गञ्जमा भइरहेको भीडभाड कम गर्ने र व्यापारिक ढुवानीलाई छरितो बनाउने अपेक्षा गरिएको छ।

नेपाल सरकारले गत जुलाईमै सो पत्रको खाका अनुमोदन गरेको थियो, तर राजनीतिक परिवर्तनका कारण त्यसबेला हस्ताक्षर प्रक्रिया रोकिएको थियो।

पूर्वी नेपालका उद्योग–व्यापारीलाई सस्तो र छिटो ढुवानी

जोगबनी–विराटनगर रेलमार्ग २०२३ जुन १ मा दुवै देशका प्रधानमन्त्रीहरूले संयुक्त रूपमा उद्घाटन गरेका थिए। भारत सरकारको अनुदानमा बनेको यो रेलमार्ग अब कोलकाता र विशाखापट्टनम बन्दरगाहबाट प्रत्यक्ष रेलमार्फत सामान ल्याउन प्रयोग गर्न सकिनेछ।
रेलमार्गबाट ढुवानी ट्रकभन्दा सस्तो हुने भएकाले पूर्वी नेपालका उद्योग–व्यापारी तथा निर्मातालाई प्रत्यक्ष फाइदा हुने अपेक्षा छ।

नौतनवा–सुनौली भैरहवाबाट मात्र ७ किलोमिटर टाढा भएकाले पश्चिम नेपालले पनि रेल ढुवानीको लाभ लिन सक्नेछ, यद्यपि भैरहवाको ICP सम्म रेललाइन निर्माण हुन बाँकी छ।

त्रिदेशीय व्यापारलाई मद्दत

एघिल्लो प्रोटोकलले सीमित वस्तुमात्र रेलमार्फत ल्याउन अनुमति दिँदै आएको थियो। अब भने कन्टेनर र बल्क दुवै प्रकारका सामान ल्याउन सकिने भएकाले नेपालका तेस्रो देशसँगका व्यापारिक चहल–पहलमा बृद्धि हुने अपेक्षा विज्ञप्तिमा उल्लेख छ।

मुख्य पारवहन मार्ग—कोलकाता–जोगबनी, कोलकाता–नौतनवा (सुनौली) र विशाखापट्टनम–नौतनवा (सुनौली)—लाई समेट्दै बहु–मोडल व्यापारिक पहुँच बलियो बनाइनेछ।

नेपाल–भारत व्यापार असन्तुलन यथावत

नेपालले अघिल्लो आर्थिक वर्षमा भारतमा २२४.६८ अर्ब रुपैयाँ बराबरको निर्यात गरेको थियो भने १.०७ खर्ब रुपैयाँको आयात गरेको थियो। यसरी देशको व्यापार घाटा ८४६.५१ अर्ब रुपैयाँमा पुगेको छ। नयाँ रेल पहुँचले दीर्घकालीन रूपमा व्यापार सन्तुलनमा सकारात्मक असर पर्ने आशा व्यक्त गरिएको छ।

ट्रान्जिट विशेषज्ञ रवी सैञ्जुले सामाजिक सञ्जालमा लेख्दै भनेका छन्—
“भारतीय गेटवे पोर्टबाट विराटनगर रेलवे यार्डसम्म कन्टेनर र बल्क कार्गो ल्याउन दिने व्यवस्था आजबाट लागू भयो। यसले पूर्वी नेपालमा तेस्रो देशका कच्चा पदार्थ र उत्पादनको ढुवानी समय र लागत घटाउनेछ।”
उनका अनुसार, भैरहवाका लागि पनि प्रभावकारी रेल ढुवानी गर्न ECTS नियमावली संशोधन आवश्यक छ।

पृष्ठभूमि

नेपाल–भारत व्यापार तथा ट्रान्जिट सन्धि १९६० मा पहिलोपटक गरिएको हो, जसले नेपाललाई भारत हुँदै तेस्रो देशको व्यापारिक पहुँच सुनिश्चित गर्छ। यो सन्धि प्रत्येक केही वर्षमा नवीकरण हुँदै आएको छ।
ट्रान्जिटमार्फत नेपालका तेस्रो देशका सामानहरू मुख्य रूपमा कोलकाता/हल्दिया तथा विशाखापट्टनम बन्दरगाह हुँदै आउने गर्छन्।

यसपटकको संशोधित प्रोटोकलले नेपाल–भारतबीचका आर्थिक, व्यापारिक तथा पारवहन सम्बन्धहरूलाई थप दृढ बनाउने विश्वास व्यक्त गरिएको छ।

The post भारत–नेपाल रेल व्यापर सञ्जाल विस्तार : रेलमार्फत व्यापार सहज बनाउने पत्र आदान–प्रदान first appeared on You TV Nepal.